روابط سريعة

قصص نجاح

متعافي الخط الساخن

انا بطل الحكايه ----- انا متعافي

 

 

 

 

 




 

 

 

 

متعافي (م . أ) – بطل سنتين و5 شهور. (اطلع بره البيت)

  • أنا عندي (38 سنة) ابتديت سجاير وانا عندي (17 سنة) وبعد السجاير كان في أدوية الكحة وبعدها البانجو ودخلت بعدها في البرشام وبعد كدة الكحوليات وفي الآخر الهيروين في الفترة اللي عندي (17 سنة) كان صوتي من دماغي ومكنتش في حد بيسألني رايح فين وجاي منين وكنت عامل فرشة ملابس جنب البيت وابتديت اتعرف على الحشيش وبعد كدة الهيروين وابتديت آخد بشكل غير منتظم كل عشر أيام لغاية ما الدنيا بدأت مش متظبطة وابتديت يبان علية وعايز كل شوية وبعد كدة بقيت يوم آه ويوم لأ لغاية ما وصلت كل يوم 3 إلى 4 مرات في اليوم وحصلت لي مشاكل مع اخواتي وكانوا بيطردوني برة البيت ومديت إيدي على البيت وأخذت حاجات من أمي ومن شقق اخواتي البنات والمحل بتاعي وقع وبعت كل اللي في المحل عشان اشتري بودرة واتحبست وانا رايح أجيب وكان معاية مخدرات وخدوني وقعدت 7شهور وبعدها جه وقت العلاج وابتديت أتصل بالخط الساخن – أنا مكانش معاية فلوس العلاج قالولي أقرب حاجة ليك مستشفى المطار وابتديت أتابع في العيادة لحد ما اتحجزت وقبلها كان في كذا محاولة تبطيل فاشلة واتحجزت تبع الخط في ركن كاريتاس واحة الأمل وهناك أخذت قرار العلاج ومحتاج إني أنا أتغير وأخصائي الخط كان بيتابعني جلسات فردية ومتابعة البيت والتواصل اللي ما بيني وما بينه هو المشرف علي في الإجازات ووضع برنامج للأجازة وبيتابعني في الجروبات وعرفت إيه المشاكل اللي كانت بتوقعني دلوقتي اتجوزت وبعد سنة تبطيل واخواتي اللي كانوا رافضين مساعدتي دلوقتي بيساعدوني ومراتي حامل في 9شهور ماسك مدير علاجي في مكان خاص وفتحت المحل تاني بتاع الملابس شغال جملة وقطاعي والخط ساعدني في أخذ القرض فاتصلت بأخصائي الخط وقالي آجي أقابل موظف مسئول عن موضوع القرض في الصندوق، وقدمت المشروع وتمت الموافقة عليه ومشيت في الإجراءات وأخذت الفلوس وابتديت أوضب المحل بأول دفعة وتاني دفعة جبت البضاعة وفتحت يوم 23 رمضان ودي كانت بداية جديدة.

 

 

 

 

متعافي (أ . ح) – مبطل من سنة و 11 شهر . (صاحبي اتقطع دراعه)

  • أنا عندي (28 سنة) ابتديت سجاير وانا عندي (15 سنة) ودخلت في المخدرات وانا عندي (17سنة) وأصحابي دخلوني في المخدرات سنة بعد سنة عن طريق الأفراح وحب الاستطلاع مع الصحبة وابتدى طريقي في الإدمان والموضوع ابتدى بالحشيش وبعد كدة ترامادول وبعدين بودرة استمريت فيها ولقيت ان انا على الضياع وان انا حموت، ووصلتني اني أشتغل في السلاح وكذا مرة كنت حموت في الجبل وكسبت فلوس كتير من السلاح بس البودرة أخذتها، وقررت العلاج لما لقيت واحد صاحبي أخذ بودرة غلط واتقطع دراعه، دخلت مستشفى خاصة مرة واحدة وقعدت 15يوم ولم أستفيد بثقافة علاجية وكان تبطيلي حيفشل فتحوجهت للخط الساخن وقابلوني هناك وانا مكنتش مقتنع وقلت ده زي ده ومش هستفيد حاجة لكن قابلوني كويس، الخط الساخن وكلموني وفهموني ان في ثقافة علاجية وهاتعلم وهاطلع فاهم التبطيل كويس واتحجزت وابتديت أسمع منهم وبقى عندي ثقافة علاجية سلاح أحارب بيه وأفضل مستمر في التبطيل وأنا دلوقتي مبطل بقالي سنة و11 شهر وأنا سعيد ومرتاح في التبطيل ومستمتع بالحياة وباشتغل كويس وبنام زي أي إنسان طبيعي وسوي ومش باعمل أي حاجة تغضب ربنا وباصلي الخمس أوقات.




متعافي (ك . س) – مبطل من 7 سنوات. (امي كانت حاسه)

  • أنا عندي (21 سنة) سبب دخولي المخدرات وفاة والدي وانا متعلقة بيه في سن صغير وكان عندي (5 سنوات) بدأت أدخن سجاير وانا عندي (7 سنوات) وبدأت أقعد مع أولاد عمي وهما ضريبة أصلاً والجو كان عاجبني، بدأت أضرب حشيش معاهم وانا سني (9 سنوات) وبعد كدة مبقاش في حشيش بقيت أشرب بانجو وبدأ التفكير واللياقة تضعف واحد من أولاد عمي اعطاني ترامادول واستمريت فيه (6 شهور) ثم أخذت ماكس وبعدها دخلت في البودرة فقعدت في مشوار الضرب (5 سنين) لحد سن (14 سنة) وخسايري كانت فلوسي ومشاكل في البيت وعدم ثقة وكذب وحوارات والماديات كانت خراب الدنيا في البيت باخد أي فلوس قدامي مليش دعوة دي بتاعت مين ولا رايحة فين، والدتي حست ان في مشاكل وجهتني لدكاترة نفسيين بس محدش عرف اني باخد وبعد كدة ماما لاحظت ان سلوكياتي اختلفت باكذب واحور واسرق ومستوى الدراسة انهار تأخير برة البيت وبعد كدة مكملناش مع الدكاترة، وبعد كدة حصلت مشكلة في البيت عندنا محل كما مأجرينه وكنت في فرح مع ناس صحابي وضارب وراجع لقيت اللي مأجر المحل وقفني علشان يديني الإيجار فأخذته مطلعتش رحت اتعاملت وبعدين رجعت وأمي عرفت ودخلت قلتلها عايز أقولك حاجة ومتزعليش أنا باشرب مخدرات قالتلي مش عارفة كنت حاسة وقالت انت عندك استعداد تتعالج قالت ان في واحدة صاحبتها ليها في المجال ده دلتها على الخط الساخن ورحت الدمرداش ومصاريف العلاج بالنسبة للخط الساخن مقارنة بالاماكن الأخرى لا تذكر لأن العلاج مجاني وموضوع السرية كنت قلقان منه في الأول بعد ما اتعاملت مع أخصائي الخط الساخن حسيت بالاطمئنان شوية وأخصائي الخط الساخن نقلني من دنيا لدنيا ومكنتش متصور ان أسلوب الحياة اللي كنت فيها يتغير لكن اكتشفت غير كدة خالص في السلوكيات والثقة في البيت ومكونتش متوقع انها ترجع وكان عندي مشكلة في البيت اني سبت البيت 3أسابيع ومكانش ممكن أتوقع اني أبقى كدة وأقعد في البيت واتكلم معاهم وأني أقدر أتواصل مع أمي أيام الضرب كدة، كانت حاجة مستحيلة، بس الدنيا دلوقتي اتحسنت كتير وبقى في اجتماعية في البيت ورجعت الثقة تاني تتظبط واحدة واحدة وده كان أكبر مكسب لية من ساعة ما بطلت، وبدأت الأمانة ترجع في فرق دلوقتي لو في تجمع أو واحد محتاج حاجة بابقى أول واحد بيساعد ومستوى الدراسة ابتدى يتحسن والتركيز يتحسن وأنا متعافي حاليا (7 سنوات).




متعافي (س . م) – مبطل من سنة. (نفسي 000اخلف )

أنا عندي (35 سنة) ابتديت سجاير وانا عندي (13 سنة) ودخلت في المخدرات وانا عندي (15 سنة) وأخذت بانجو بعد كدة دخلت في أدوية الكحة، وبعدين ترامادول وبعد كدة بودرة وأول مرة أخدت كنت راجع من الشغل مع واحد صاحبي وقاللي خد دي دماغها مية مية وكان اول أيام بيعمل معايا واجبات، وبعد كدة بقيت أطلع من جيبي وأجيب وكنت باشتغل في ورشة وكنت عارف واحد بيبيع وكنت باشتري للصنايعية اللي شغال معاهم وبطلع مصلحتي وحصلي بسبب المخدرات مشاكل مع أهلي مفيش محبة زي الأول وكره من أخواتي وأعمل مشاكل مع أمي وبألبها في فلوس وبعد ما اتجوزت بقيت مش عارف أعيش مع مراتي علطول مشاكل وأبيع الحاجة اللي في البيت وعلطول أستلف وموضوع الخلفة قعدت 4سنوات أتعالج والدكتور يقول انت معندكش حاجة انت لو بطلت هتخلف وحاولت كتير أبطل من نفسي ولكن مع المشاكل بابقى عايز أنسى وفشلت في التبطيل لوحدي، وبعد كدة قررت العلاج عرفت الخط الساخن عن طريق أسقف بالكنيسة وروحت المستشفى وقعدت مع الأخصائي كلمته بكل صراحة وقلتله وهوة قوى عزيمتي وخلاني أصر أكتر اني أبقى كويس، وقابلتني باهتمام كل ما آجي باخد قوة أكتر وبتعلمني اللي انا مش فاهمه وبتديني قوة وإرادة إن أنا أبقى كويس، ودلوقتي أنا مبطل بقالي سنة ولاقيت كله بيساعدني اللي كان بيستخسر فية الفلوس دلوقتي بيساعدني ودلوقتي مراتي حامل في الشهر الرابع ومافيش مشاكل معاها وحاسس اني دلوقتي إنسان.




متعافي (ط . أ) – مبطل من سنة وأربع شهور. (مبقيتش مهندس ) 

أنا عندي (37 سنة) بداية المخدرات معاية بدأت في سن مبكر تقريباً في مرحلة الإعدادية بدأت مع الأصدقاء في المدرسة والأفراح والمناسبات مثل وقفة العيد والعيد وشم النسيم وأي مناسبة سعيدة أو حزينة بدأت بتعاطي البانجو وتدرج الموضوع إلى أدوية الكحة ثم الأقراص بجميع أنواعها إلى أن انتهى الأمر إلى الهيروين والكوكايين، وفي بداية الأمر لم أحس بأي خسارة مادية أو معنوية، أنا كنت باعمل مهندس في أحد الشركات الكبرى وكان الراتب الشهري يصل إلى 4200جنيه شهرياً فكان الموضوع عادي وأنا مميز ومختلف عن أي حد في سني إلى أن وصلت إلى مدمن، وبدأت الخسائر المادية والمعنوية وتركت العمل بسبب الاختلاس والسرقة وبدأت بداية الضياع الأسري وبدأت الدنيا تتقفل في وجهي إلى أن وصلت إلى رقم الخط الساخن للإدمان وكان بالنسبة لي بمثابة طوق النجاة، كنت في بادئ الأمر غير مقتنع ومش مصدق ومحدش هيعمل حاجة إلى أن أخويا اتصل برقم الخط الساخن وتم توجيهي إلى أقرب مستشفى تابع لها وبدأت سلسلة العلاج والتعافي وبدأت أجلس مع أخصائي نفسي ولقيت اهتمام ورعاية أنا شخصياً في بداية الأمر مكنتش مصدق لأن الموضوع مجاني وفي سرية تامة، وبدأ الأخصائي ينقلني من مرحلة إلى مرحل في التعافي ومتابعتي حتى داخل الأسرة وفي العمل وفي جميع مراحل حياتي إلى أن أصبحت الآن بفضل الله ثم بفضل صندوق مكافحة المخدرات والخط الساخن شخص متعافي ناجح في حياتي وأصبحت رب أسرة ناجح وأصبح الخط الساخن مش ساعدني أنا لوحدي بل ساعد جميع أفراد أسرتي وأولادي لأنهم بجد رجعوني راجل محترم ونافع لأسرتي وللمجتمع وأنا مبطل دلوقتي سنة وأربع شهور.




متعافي (ت . ي) – مبطل من سنتين. (ضيعت كل  حاجه)

أنا عندي (39 سنة) بدأت بشرب السجاير وانا سني (14 سنة) وبدأت مخدرات وأنا (15سنة) كان والدي بيقعد مع عمي في الشقة اللي جنبنا علطول وكانوا بيقعدوا يشربوا. وفي مرة المخدر كان محطوط على الترابيزة وعمي دخل يتكلم في التليفون فأنا أخدت حتة من المخدر حب استطلاع ده بيعمل إيه، ودي كانت أول مرة كان حشيش وجربته وجالي هيسترية ضحك وكلام غريب ودي كانت البداية، دخلت بعد كدة في البرشام بأنواعه كلها وجميع أنواع الأدوية الكيماوية وبعدين مادة عالية الكلام ده خلاني آخد أجازة من نفسي وأنسى دوري مع نفسي، ومع أهلي ومع المجتمع ودخلت في مشاكل بسبب اني خسرت كل الناس اللي كنت باعرفها وأهلي وقرايبي بسبب تصرفاتي وأفعالي بمد إيدي وأنصب وأعمل حوارات عايز المخدرات بغض النظر عن العواقب من غير ما أبص لأي حاجة المهم أحصل على رغباتي مش مهم بأذي نفسي أو غيره المهم أحصل على اللي انا عايزه، خسرت سني عمري راح واتفاجئت اني كبرت من غير ما أعمل حاجات كتير تتعمل، دلوقتي باشوف عيل صغير أشتم المرض ليه حرمتني يكون عندي طفل وبعد كدة اكتشفت اني عايش مشوار واحد متكرر على مدار سنوات طويلة كل ما يتغير سن بكبر لكن مفيش نتائج إيجابية بتحصل غير إن قائمة الخسائر تزيد، مافيش أي إيجابي ده خلاني أفكر في العلاج، وتاني حاجة هية إني شفت ناس شبهي ونفس مشكلتي لاقت حياتها عن طريق التعافي والخط الساخن، علاجي من غير ما أدفع حاجة خالص أخصائي الخط الساخن اداني اهتمام مشفتوش من أي حد في الدنيا ساعدني وشاف مشاكلي التي تدور في حياتي وساعدني على حلها وله دور مع أسرتي عرفني هما مين لأني كنت شايفهم كلهم وعرفهم طبيعة مشكلتي وكيفية التعامل معي ووقفته معاية بعد ما خلصت مدتي داخل المستشفى كان له دور كبير معاية برة، بدأ برسم طريقة أمشي عليها وعلمني علامات خطر المفروض أحاسب منها ولازال موجود في حياتي لحد دلوقت وهو سبب تصحيح مفاهيم مغلوطة وبعد التعافي عرفت أنا مين وإيه دوري مع نفسي وإيه دوري مع أهلي وإيه دوري مع المجتمع واكتشفت عيوبي الشخصية واكتشفت اني كنت حاكم على أهلي وعلى المجتمع واتحول اليأس إلى أمل وبقيت شايف ومتعافي دلوقتي سنتان.



برامج التوعية والتثقيف

  • برنامج اعداد الشباب

    ويهتم الدليل بإعداد النشء و الشباب وتمكينهم من نشر الوعى بأخطار مشكلة التدخين و التعاطى و الادمان بين اقرانهم فى كافة التجمعات الشبابية ، و يحرص على امدادهم بالمهارات الحياتية ..التفاصيل

  • تدريب الكوادر المتخصصة

    تنطلق هذه البرامج لتدريب الكوادر المتخصصة في مجالات التعامل مع مشكلات المخدرات و العمل على تلافي المشاكل التي يمكن الوقوع فيها في عملهم ، و كذا مدهم..التفاصيل

  • لقاءات الاتصال المباشر

    تنطلق هذه البرامج لتدريب الكوادر المتخصصة في مجالات التعامل مع مشكلات المخدرات و العمل على تلافي المشاكل التي يمكن الوقوع فيها في عملهم ، و كذا مدهم..التفاصيل


Content on this page requires a newer version of Adobe Flash Player.

Get Adobe Flash player

Powered By : CairoCodes

جميع الحقوق محفوظة لصندوق مكافحة وعلاج الادمان والتعاطى